隔墙有耳：茉莉花苗 强国禁出口
好一朵茉莉花呀！吓到强国好鬼怕呀！……内地唔止网络封锁“茉莉花”，又唔畀记者去王府井采访茉莉花集会，喺北京采访两会嘅港记讲电话提到呢三粒字，都即刻断线。不过，再离奇啲都仲有，有读者向八方反映，佢早前透过花商订购 100棵茉莉花苗，点知被内地海关扣起，又冇解释原因。事主好劳气咁话：“有冇咁夸张呀？系咪真系风声紧到咁？连花苗都唔放过？”
读者林小姐家有花园，农历年前委托花商订购国内多种花木，原定上月 28日由广州运抵香港，结果其他花都过到关，惟独嗰 100棵茉莉花苗俾内地文锦渡海关扣查，其后更没收埋。
设计图片
港人被没收成箩苗
“佢（花商）突然间打嚟，话啲花落唔到嚟俾人扣查咗，成箩茉莉苗冇咗……但其他全部落到嚟，真系好激气”。
佢话内地海关完全冇解释：“我系谂住悭少少，订啲苗嚟自己种，细细棵一箩之嘛，使唔使咁夸张呀？如果个花农唔系咁老实报关可能都冇事，因为根本得几块叶，仲要种一轮先见到花，个内地花农都觉得莫名其妙，因为佢喺入面都唔知咩茉莉花革命。”
好彩仲有西兰花食
八方问过一啲园艺界人士。缤纷园艺负责人刘小姐话，茉莉花一般喺 4、 5月先开花，“未到时候我哋都唔会订，唔会订啲苗返嚟”。香港鲜花零售业协会主席谢黄小燕话，由于香港花店都好少订购茉莉花，所以唔知内地海关系咪禁运，“家风头火势可能难啲 o架喇，不过其实茉莉花度度都有啦，唔一定要返国内订”。
大家或者会话，事件可能未必同政治有关呢，边会连茉莉花都禁运埋咁夸张？不过，喺强国所谓没有最荒谬，只有更荒谬，所以八方即管将呢单读者报料同大家 share，但有一点好肯定嘅系，强国政权真系好虚怯啰。如果今次唔系叫茉莉花革命，而系叫西兰花革命，咁家大家可能连西兰花都冇得食呀。
mailto:pf_lee@appledaily.com
